БОАЖ-ын сайд Д.Сарангэрэл ММСС-ийн удирдлагыг хүлээн авч уулзлаа

Админ
2020/09/25

БОАЖ-ын сайд Д.Сарангэрэл Монголын Мянганы сорилтын сангийн захирал Э.Содонтогос болон удирдлагуудыг хүлээн авч уулзлаа. Монгол Улсын Засгийн газар болон АНУ-ын Мянганы Сорилтын Корпорац 2018 онд эдийн засгийн өсөлтийг дэмжих замаар ядуурлыг бууруулах зорилго бүхий нийт 350 сая ам.долларын буцалтгүй тусламж үзүүлэх Компакт гэрээнд гарын үсэг зурсан. Уулзалтаар Э.Содонтогос захирал Компакт гэрээ, төслийн талаар сайдад танилцуулга хийж, төслийн хэрэгжилтэд БОАЖЯ үүрэг оролцоо ямар байх талаар санал солилцлоо. Мянганы сорилтын сангийн захирал Э.Содонтогос: “АНУын Засгийн газартай байгуулсан Компакт гэрээг хэрэгжүүлэхэд БОАЖЯ маш их үүрэгтэйг онцолмоор байна. Гэрээнд тусгагдсан үүрэг, амлалтуудыг хэрэгжүүлэн ажиллахад Байгаль орчны салбарт хамаарах чиглэл, бодлогод Д.Сарангэрэл сайд таныг илүү их анхаарал хандуулж дэмжин ажиллана гэж итгэж байна. Түүнчлэн дөрвөн сая ам.долларын үнэ бүхий лабораторийн дэвшилтэд технологиудыг Усны газарт гардуулахаар болсон. Тиймээс та бүхэн хаана лабораторийг байгуулж, ямар техник технологийн хэрэгцээ байгааг бидэнд уламжлахыг хүсч байна” гэлээ. БОАЖ-ын сайд Д.Сарангэрэл “Компакт гэрээний хүрээнд хийгдэх ажил болон хэрэгжилтэд бидний зүгээс ямар оролцоотой байх талаар ерөнхий мэдээллийг авлаа. Бид Засгийн газрын хүлээсэн үүрэг, амлалтаас өөрийн салбарт хамаарах асуудлыг хууль тогтоомжийн дагуу шийдвэрлэж, дэмжиж, хамтран ажиллах болно. Гэрээнд тусгагдсан бас нэгэн чухал зүйл болох иргэдийн усны талаарх хандлагыг өөрчлөх, соён гэгээрүүлэх ажилд хамтран ажиллахдаа Байгаль орчин, аялал жуулчлалын яам бэлэн байгааг хэлмээр байна. Ялангуяа, усны зөв хэрэглээ, усаа хайрлаж, хамгаалах, усны хомсдлоос сэргийлэх гэх мэт цогц ажлыг хамтран хийснээр үр дүнд хүрнэ гэж харж байна. Мөн лабораторийн асуудлыг ойрын хугацаанд холбогдох албаны мэргэжилтнүүдтэй хэлэлцэж, шийдвэрт хүрч эргэн мэдээлнэ” гэсэн юм


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна